50 نصيحة للمكياج وكل ادواته لازم تكوني عرفاهم!

50 نصيحة للمكياج وكل ادواته لازم تكوني عرفاهم!

كل البنات بيهتموا بالمكياج وميقدروش يستغنوا عنه .. حتى لو في البعض مش بيحب المكياج التقيل او المكياج الكامل وبيحب يحط حاجات بسيطة ومكياج خفيف لكن كلنا في الاخر بنحب نعرف ونقرا عن المكياج وعن اساليب ونصايح وحاجات تفيدنا في مكياجنا عشان كده احنا جيبنالكم شوية حيل ومعلومات مفيدة جدا و نصايح لكل ادوات المكياج وطرق وفنون وضعه لما هتعرفوها مش هتستغنوا عنها ابدا.

نصايح وحيل في المكياج

ياللا تعالوا نعرف مع بعض ايه هي نصايح وحيل المكياج:

  • كريم الاساس:

اول نصايح معانا لكريم الاساس اللي هو يعتبر اساس مكياجنا ولازم نظبطة كويس عشان المكياج كله يطلع مظبوط هنقولك شوية حيل ونصايح هتخلي كريم الاساس يطلع مظبوط ويوحدلك لون بشرتك ويداري اي عيوب.
1- اول حاجة عشان كريم الاساس يبقى مظبوط ويعمل تغطية كاملة لبشرتك ويداري اي عيوب حطية باسفنجة او بالفرشة الخاصة بكريم الاساس مش بايدك.
2- حطي كريم الاساس بفرشة ناعمة لانها هتساعدك انه يمتزج بالبشرة احسن وحطيه بطريقة الخبط على البشرة مش بالفرد.
3- قبل ما تحطي كريم الاساس اغسلي وشك كويس جدا ونشفيه كويس عشان الكريم ما يتأكسدش على وشك ولونه يغير وبعد ما تحطي الكريم سيبيه كام دقيقة ينشف على الوش ويتشربه كويس قبل ما تحطي البودرة.
4- اختاري كريم الاساس المناسب لنوع بشرتك بالنسبة للبشرة الدهنية اللي دايما بيظهر فيها حبوب اختاري كريم الاساس الخالي من الزيوت, والبشرة الجافة والعادية احسن نوع ليها هي اللي في مكونات مرطبة, وللبشرة الحساسة افضل نوع كريم اساس ليها هو النونكوميدو جينيك او المضاد للحساسية.
5- اختاري لون كريم الاساس الاقرب للون بشرتك يعني ولا يكون فاتح اوي ويطلع شكله مش طبيعي ولا غامق اوي انسب حاجة اللي بيكون افتح من لون بشرتنا بدرجة واحدة بس.
6- لما بنيجي نشتري كريم الاساس دايما بنجرب اللون على ايدينا لكن ده مش صح لان لون ايدينا مختلف عن لون وشنا ولما بنجرب على الايد بيطلع اللون مش هو اللون المناسب للون بشرتنا لكن المكان الصح لاختبار لون كريم الاساس اللي يمشي مع بشرتنا هو عند خط الفك بين الوش والرقبة.
كريم الاساس
  • الكونسيلر:

 الكونسيلر مهم للي عندهم هالات سودا الكونسيلر بيخفيها تماما.
7- الكونسيلر لما تيجي تشتريه اشتري اللون الافتح من لون بشرتك بدرجة.
8- حطي الكونسيلر اول حاجة قبل ما تحطي كريم الاساس او اي مكياج وافردية كويس تحت العين لان ده بيساعد انه يغطي الهالات السودا افضل.
الكونسيلر
الكونسيلر
  • البودرة:

البودرة مهمة جدا لانها تعتبر اللمسة الاخيرة اللي بتثبت باقي المكياج وبتخفي عيوب البشرة خالص وبتمتص الزيوت والدهون الزايدة في الوش ومتخليهوش بيلمع.
9- استخدمي البودرة الشفافة لانها افضل نوع بيساعد على تثبيت كريم الاساس.
10- كما من احسن انواع البودرة هي البودرة المضغوطة اللي بتكون اتنين في واحد بودرة وكريم اساس مع بعض لانها بتغطي اي عيوب في البشرة وبتديكي تغطية كاملة.
11- امزجي البودرة كويس على الوش سواء لو كنتي بتستخدمي الفرشة او السفنجة عشان ميبقاش في خطوط باينة في المكياج ويطلع شكله مش حلو.
البودرة
  • البودرة البرونزية:

البودرة البرونزية من الحاجات اللي بتدي شكل حلو جدا للوش وبتظهر جماله
12- لو انتي من محبات المكياج البرونزي اختاري لون البودرة البني المايل للبرتقاني ده انسب واحلى لون عشان يديكي نتيجة حلوة.
13- حطي البودرة البرونزية على الانف والجبين ووسط عضمة الخد لان دي الاماكن اللي هتظهر جمال وشك اكتر.
14- حطي شوية من البودرة على منطقة الرقبة والصدر عشان لونهم يبقى ماشي مع لون الوش.
البودرة البرونزية
  • البلاشر او احمر الخدود او الروجاجو:

البلاشر ده بيعتبر اللمسة الاخيرة اللي بتدي حياة للمكياج وتظهره.
15- لما تيجي تحطي البلاشر حطي كذا طبقة لان ده هيخليه يقعد فترة طويلة خصوصا لو هتقضي يومك كله بره البيت وعايزة مكياجك يفضل معاكي لاخر اليوم.
16- حطي البلاشر من اول نص عضمة الخد بطريقة افقية لحد نهاية الخد عند منبت الشعر وامزجية كويس على بشرتك.
البلاشر
البلاشر
  • الايشادو:

الايشادو من الحاجات اللي مش بنستغنى عنها لانه بيظهر جمال ولون العين جدا.
17- لو عايزة الايشادو يكون في لمعة او اضاءة شوية بلي فرشة الايشادو بشوية ماية بسيط وبعدين حطي بيها الايشادووهي مبلولة بطريقة الخبط مش بالفرد.
18- قبل الايشادو استخدمي برايمر العين لانه بيساعد ان الايشادو يثبت لفترة اطول.
19- عشان تخلي عيونك بارزة بشكل حلو طبقي كونتور العين بانك تحطي عند خط الجفن المتحرك ايشادو بني او بني غامق ده هيبرز جمال العين جدا.
20- لما تحطي ايشادو غامق خليه عند حافة العين من فوق او عند الخط الخارجي للعين من فوق بس ومتخليهوش يقفل زاوية العين لان ده بيدي شكل اصغر للعين.
الايشادو
  • الروج:

21- قبل ما تحطي الروج قشري شفايفك كويس واتأكدي انه مافيش جلد ناشف على الشفايف لان ده بيخلي الروج يطلع شكله مش حلو, ممكن تقشريها بانك تفركيها بالراحة بشوية سكر وعليهم عسل ده هيشيل الجلد الميت ويخلي شفايفك ناعمة جدا.
22- لو عايزة الروج يثبت معاكي فترة طويلة حطي على شفايفك كريم اساس قبل الروج وبعدين حطي الروج بتاعك عادي وبعد ما تحطي الروج جيبي منديل حطية على شفايفك وحطي عليهم بودرة وبعدين ارجعي حطي طبقة روج تانية الطريقة دي هتخليه يثبت معاكي طول اليوم.
23- لو عايزة شفايفك تبان اكبر بقلم تحديد الشفايف حددي بيه بره حدود الشفايف من فوق ومن تحت وبعدين حطي الروج بتاعك عادي وابعدي عن الوان الروج الغامقة اوي لانها بتصغر الشفايف, كمان الروج اللي فيه لمعه بيبين الشفايف اكبر من الروج المات او المطفي.
24- في حيلة تانية كمان عشان تكبري بيها الشفايف ويطلع شكلها مليان حطي لون غامق على كل الشفايف وجيبي لون تاني افتح حطي في منطقة نص الشفايف وفي الاخر حطي ملمع الشفايف ده هيخلي الشفايف تبان اكبر وشكلها حلو, وممكن تحطي كمان كريم مضي على الجزء اللي فوق الشفة اللي فوق في النص بتدي شكل ولمعة حلوة جدا وحجم اكبر للشفايف.
25- لو انتي مش بتشتري الوان روج كتير ممكن انتي تبتكري الوان جديدة بالالوان اللي عندك ممكن تجربي تحطي لونين او اكتر على بعض وتبتكري بيهم لون جديد.
26- عشان تخلي شكل الشفايف حلو وناعم قبل ما تحطي الروج حطي طبقة من زبدة الكاكاو واستني كام دقيقة وبعدين حطي الروج بتاعك.
الروج
  • قلم تحديد الشفايف:

27- لون قلم التحديد لازم يكون ماشي مع لون الروج بتاعك عشان قلم التحديد هو مكمل للروج مينفعش تحطي لون بعيد عن لون الروج بتاعك لان الشكل هيطلع مش حلو.
28- عشان تخلي لون الروج يثبت معاكي فترة طويلة حطي قلم تحديد الشفايف على شفايفك كلها وبعدين حطي الروج ده هيخليه يثبت معاكي فترة اطول.
قلم تحديد الشفايف
  • ملمع الشفايف:

29- لو شفايفك صغيرة ممكن تكبريها بملمع الشفايف تحطي منه في منطقة نص الشفايف ده هيبينها اكبر.
30- لو عايزة ملمع الشفايف يقعد معاكي فترة طويلة قبل ما تحطيه حطي على شفايفك بودرة واتأكدي انه مافيش بودرة زيادة على شفايفك شيلي كل الزيادة بمنديل وبعدين حطي ملمع الشفايف بتاعك ده هيخلي الملمع يقعد معاكي فترة طويلة وكمان ميسحش.
ملمع الشفايف
  • الايلاينر:

الايلاينر من ادوات المكياج المهمة جدا لانه بيظهر جمال العيون وبيوسعها.
31- الايلاينر عشان يطلع مظبوط معاكي ارسميه بعد ما تحطي الايشادو وقبل ما تحطي الماسكارا ولكن قبل ما تحطي الايلاينر اتأكدي انه الكحل نشف عشان ميتلخبطش والمكياج بتاعك يبوظ.
32- لو عايزة الايلاينر ميكونش ظاهر بشكل قوي اوي على عينيكي ممكن بعد ما تحطيه تجيبي عود قطن من بتاع الودان او بصباعك وتمسحي بخفة جدا على الايلاينر عشان تخففي من قوة اللون شوية.
33- انما بقى لو عايزة اللوك يكون قوي والاسود تقيل اوي حطي ايشادو اسود فوق خط رسمة الايلاينر بتاعتك كمان الحيلة دي هتخلي الايلاينر يقعد فترة اطول معاكي.
34- ممكن عشان تخلي الرسمة ناعمة ومش حادة اوي تحطي عليها لمسة خفيفة من لون الايشادو اللي انتي حطاه.
الايلاينر
  • الكحل:

الكحل من الحاجات اللي مش بنستغنى عنها حتى لو مش حاطين مكياج خالص ممكن نكتفي بالكحل بس عشان ندي شكل حلو لعينينا.
35- عشان الكحل ميلطخش تحت عينيكي حطي بودرة مضغوطة تحت العين قبل ما تبدأي ترسمي الكحل.
36- عشان تخلي الكحل يقعد فترة اطول وميسحش منك جيبي ايشادو من نفس لون الكحل وحطي منه على الكحل بتاعك بفرشة الحيلة دي بتخليه يمتص اي زيوت او رطوبة وده بيخليه ميسحش ويقعد معاكي اطول فترة ممكنة.
37- في حيلة تانية بردوا عشان تخلي الكحل بتاعك يثبت وميسحش انك تحطي الايلاينر السائل على الجفن اللي تحت بعد ما تحطي الكحل, طبقة الايلاينر دي بتبقى زي عازل للكحل وتخليه ميسحش ويثبت معاكي.
38- لو جفونك من النوع الدهني شوية ومش بيثبت عليها المكياج ممكن قبل ما تحطي المكياج تمسحيها بعود قطن عشان يمتص كل الزيوت والمكياج يثبت معاكي.
الكحل
  • الماسكارا:

39- عشان تدي رموشك شكل اطول حطي طبقة ماسكارا وخليها تنشف وبعدين حطي طبقة تانية ده هيدي رموشك شكل اطول واحلى.
40- عشان الماسكارا متلطخش المكياج بتاعك اللي انتي حطاه حطي تحت عينيك بودرة شفافة قبل ما تحطي الماسكارا وبعد ما تحطيها شيلي البودرة بالفرشة. أو استعملي حيلة المعلقة اللي قلنا عليها قبل كده.
الماسكارا
  • قلم تحديد العين الابيض او البيج:

القلم ده من الحاجات التحفة اللي بتدي وسع للعين وشكل جميل جدا
41- عشان تطبقيه صح ويطلع شكله حلو حطيه على الحافة الداخلية للعين من تحت.
42- لوعايزة تظهري الايشادو بتاعك وتخلي شكله احلى حطي خط من قلم التحديد الابيض على جفن العين اللي فوق من جوه.
43- لوعايزة اللوك يطلع طبيعي اكتر وانعم اختار القلم البيج اللي بيكون زي لون البشرة بدل الابيض.
قلم تحديد العين الابيض

– تقريبا كده احنا خلصنا الحيل الخاصة بادوات المكياج بتاعتنا كلها هنقولك شوية نصايح يومية سريعة لازم تعرفيها:

44- اللي بشرتهم دهنية افضل كريم اساس ليهم عشان ميسحش ويثبت كويس على البشرة هو كريم الاساس اللي بيكون من مكوناته مادة السيليكا لما تيجي تشتري كريم الاساس بصي على مكوناته واتأكدي ان فيه المادة دي لانها بتتحكم في زيوت البشرة وتخلي المكياج يثبت.
45- عشان تشيلي المكياج اللي ضد الميه لازم تستخدمي مزيل المكياج مش كافي بس تشيليه بالميه والصابون لانه مش هيشيله بشكل كامل, ومتستخدميش المكياج اللي ضد المية باستمرار الا لو كنتي محتاجة ده هتقضي مثلا اليوم كله بره ومحتاجة المكياج يثبت طول اليوم لكن في الاوقات العادي افضل تستخدمي المكياج العادي مش اللي ضد الميه.
46- لازم تكوني حريصة جدا انك تنضفي فرش المكياج بتاعتك كل اسبوع عشان تشيلي اي تراب او ميكروبات من عليها ومضريش بشرتك ممكن تغسليهم بشوية مية ومعاها شامبو اطفال ده هينضفهم كويس.
47- استخدمي واقي الشمس يوميا ويكون عامل الحماية فيه مش اقل من 15% ويكون من مكوناته اكسيد الزنك وثاني اكسيد التيتانيوم لان المواد دي فعالة جدا في الحماية من الشمس.
48- عشان تدي عيونك شكل سموكي حلو حطي الايلاينر السائل على الجفن اللي فوق وبعدين بسرعة قبل ما ينشف افردية شوية تحت خط العين بفرشة الايشادو وامزجية كويس مع الايشادو.
49- جربي تستعملي ال “Lash Curler” أو اداه تني الرموش, اللي بتتني وتطول الرموش قبل الماسكرا عشان تدي تأثير اكبر للماسكارا, وعشان تسرعي العملية جربي إنك تدفي المكنة ده 10 ثواني بس بالسشوار.

50- اخر نصيحة معانا انت تمزجي مكياجك وتدمجيه مع بعضه كويس عشان يطلع بشكل حلو وطبيعي.
نشر المقال على جوجل +

About Karim Hemida

This is a short description in the author block about the author. You edit it by entering text in the "Biographical Info" field in the user admin panel.
    Blogger Comment
    Facebook Comment

0 التعليقات :

إرسال تعليق